我ê名叫做謝孟容，民國八十一年出世，佇阮兜排行第三，是尚細漢ê查某囝。因為我ê爸母ê工課足無閒，我出世無多久就交予奶母照顧，蹛佇奶母in兜。我ê奶母是一个真好ê阿婆，我攏叫伊阿媽，伊嘛給我當作是家己ê孫仔按呢愛護我。奶母袂曉講國語，in家ê人嘛盍定定講台語，所以我細漢ê時陣是先會曉講台語，後來去讀幼稚園盍會曉講國語。
我ê奶母是影響我足深ê人，自我細漢伊攏tshuā我去拜拜，參加足濟佛教ê活動。伊定定教我一寡做人ê道理，比論講愛好好矣讀冊、做代誌愛認真、愛有孝爸母等等，遮寡話猶閣佇我ê心內記牢牢。伊嘛是我足感謝ê人，伊不止養飼我niā-niā，伊給我當作家己ê親生孫仔仝款。即使我離開in兜已經十多年矣，伊嘛是定定講著我，定定問我遮má過了按怎。
佇我幼稚園畢業了後，我阿母就tshuā我搬轉去，轉去蹛家己ê厝。我有一个阿兄洽一个阿姊，阿兄比我大十二歲，阿姊比我大十歲。我洽爸母、兄姊閣有我阿媽蹛做伙。我自細漢就比仝年紀ê囡仔高，所以有『lò腳』遮ê外號。我ê奶母洽阿母講我細漢時是一个真巧、活潑、出頭足濟ê囡仔。
遮má，我已經十九歲矣，進大學了後愛為家己負責，愛好好矣思考家己ê未來。我相信，我ê人生當欲開始，我會當自遮má開始決定我未來ê方向。
請先 登入 以發表留言。