四月十一號這工透早，阮台語系 ê 同學做夥坐遊覽車到雲林，開始阮迎媽祖 ê 活動。阮到位下車了後，徛佇路邊等待尪仔轎ê隊伍行過來。阮大部分ê人攏無迎媽祖 ê 經驗，所以大家看起來真有興趣 ê 感覺。佇路邊 ê 人愈來愈濟，阮就知影媽祖轎仔欲來矣。足濟人開始排隊準備欲鑽轎跤，我嘛趕緊擠入去排隊 ê 隊伍內底，毋閣排隊ê人實在是傷濟閣傷擠，全部ê人擠做夥一直退後，等到轎仔欲到 ê 時陣才趕緊俯落來。這是我第一擺看著這種場面，嘛見識到媽祖信仰對民眾 ê 影響。無論是求平安、治病痛，抑是啥乜原因，大家攏想欲透過「鑽轎跤」來獲得好運。
阮鑽轎跤了後，就綴佇轎仔後壁行。按早時九點半左右行到過中午，才停落來食物件歇息。佇路上，有足濟熱情ê人送水、飲料予阮。因為有遮 ê 熱情民眾，阮攏免驚會喙乾。我印象較深 ê 是提著花生麻糬，彼个麻糬是又香又軟，閣會當食到花生 ê 粒。真正是足感謝遮 ê 人，予阮佇迎媽祖 ê 路上感覺到台灣人 ê 熱情洽溫暖，嘛予阮氣力繼續向前行。這嘛是台灣一種特殊 ê 景象pah！佇迎媽祖 ê 路上提免錢 ê ，但是阮袂使討債，袂使共人提傷濟，嘛愛用感恩 ê 心去接受 in ê 好意。
沿路 ê 徛家攏企歸排人，看會出民眾對媽祖 ê 尊重洽敬愛。媽祖轎行到啥乜所在，遐就開始放炮仔，實在是足鬧熱欸！毋閣，炮仔 ê 聲是真大聲，不只愛閃爾爾，閣愛掩耳腔。阮行到差不多四點 ê 時陣，就到今仔日 ê 終點矣！我和同學佇奉天宮附近買一寡物件食，大家看起來是真悿，但是我相信一路行過來 ê 人是真有成就感 ê！阮就按呢一面歇息一面開講，等到欲集合發車 ê 時間到。
坐佇遊覽車內，我回想今仔日 ê 代誌，雖然是一直行路，但是我感覺誠有意義。這是一个特別 ê 經驗，會當予阮瞭解台灣 ê 媽祖文化，嘛予阮親身感受到遶境 ê 辛苦。希望這項民俗活動會當繼續舉行、繼續傳下去，好好矣保留台灣人純樸閣可愛 ê 一面。
(我 ê 相片攏無翕家己)
請先 登入 以發表留言。